香煎一夜情

　　同“一夜情”有關嘅人士唔使緊張，標題講嘅只系一個菜名，同“咸”有關，同“情”無關，你哋唔使驚俾人香煎。

　　線日小弟喺龍津東一間酒樓食飯，樓面經理噬開排牙推薦我哋食“香煎一夜情”。咦？乜東東嚟嘎？睇清楚旁邊嗰張配圖，妖！原來系煎鱸魚。

　　眾所周知，粵菜有好多有寓意嘅菜名，比如“發財就手”其實就系發菜豬手，咁呢個“一夜情”又同鱸魚有乜Q關系呢？“經理哥哥”。呢條友耍手兼擰頭：唔知，剩系知大家都系咁叫嘅。

　　或者系我孤陋寡聞吧，但總要虛心向學，唔識就要問。于是上網查，揾人問，卒之俾小弟揾到答案。我頂！乜嘢“香煎一夜情”呀，其實系“香煎一夜埕”。

　　以前，廣東啲漁民出海打魚，因為來回起碼要兩日，佢哋為咗返歸嗰時啲魚唔變質，就將啲魚成條放入一個埕里面用粗鹽腌一夜（埕：喺廣東系指一種用嚟裝酒或腌制食物嘅缸瓦器具，相當于外省人所講嘅壇子）。后嚟大家發現，喺埕里面腌過嘅魚，唔單只可以保質，味道仲好鬼死正，咁索性將呢種腌魚叫做“一夜埕”，粵語“埕”“情”同音，中意搞笑嘅人就加多一執“鹽”——改叫“一夜情”。好多酒樓覺得呢個名夠“味”，就照板煮碗攞嚟用。